بأقلامهم

“إعمال العقل”

من وجهة نظري يا جماعه انا شايف ان المنظومه كامله ، ربنا خلقها كده بمقدار وهو اعلم بكل ما فيها وبحكمته يغير في اي شئ من وإلي .

ربنا سبحانه وتعالي قال في سورة الانعام : “وهو الذي جعلكم خلائف الارض ورفع بعضكم فوق بعض درجات ”

دلوقتي اللي بيبقي عنده اي غرض عاوز يحققه بيستخدم اللعب عالمشاعر عشان يحققه وتحديداً بيستخدم الناس الغير ميسوري الحال بس مش بيقولها بالمسمي الاخلاقي ده لأ ، بيستخدم اللفظ الاقرب للضغط علي العاطفه ويقول الفقرا ويمسك في النغمه دي مع استخدامه للغة الجسد وتعبيرات الوجه عشان يوصل لقلوب الناس فيصدقوا فيه و يصغوا بقلوبهم ويبتدي هو يشحن فيهم و يوجههم لتحقيق غرضه وكمان يبدأ يكسب طبقه غيرهم اللي هما الناس الميسوري الحال  ولكن حاسين بالاقل منهم حال فينضموا ليه بس الحقيقه ان الناس دول بينضموا ليه عشان هما لاغيين العقل وبيخلوا العاطفه هي اللي تسوقهم و عاوز اقول هنا حاجه مهمه قوي

” العاطفه لا تسعي إلي معرفة الحقيقه ، العاطفه علي ما تُوَجَّه نحوه فقط ”

لكن الناس دي لو استخدموا عقلهم شويه هيكتشفوا انهم اتسرعوا والحقيقه انهم كمان هيشوفوا حاجات كتير غفلوا عنها لما تعاطفوا دون ان يتعقلوا .

كمان في سؤال مهم جدا لازم نسأله لنفسنا …

هو إحنا هنكون احن من ربنا علي عباده ؟!

احساسنا بالاقل مننا وضعاً ده شئ جميل وفي منتهي الإنسانيه وده كمان دليل علي نقاء قلوبنا بس الإحساس ده لازم يتم ترجمته لافعال علي ارض الواقع وانا بشوف ان اكبر دليل علي اننا لازم نكون صحاب افعال ان ربنا وضع الصدقه كإحدي اركان الاسلام الخمسه ، يعني الناس دي ليها رزق جوه رزقنا .

يعني لما ربنا يبعت رزق لاي حد فينا لازم يبقي فاهم ان فيه حق لغيره موجود معاه والحق ده هو الصدقه اللي هي زي ما قلنا ” ركن من اركان الاسلام ” .

حبة وعي يا جماعه ونثقف نفسنا عشان عقلنا اللي يحركنا ومنديش فرصه لأي حد يستخدم مشاعرنا لتحقيق اغراضه الشخصيه .

بقلم الشاعر رامى فؤاد

أمانة التدريب والتثقيفحزب الحركة الوطنية المصرية

الوسوم
زر الذهاب إلى الأعلى
إغلاق